William Somerset Maugham

William Somerset Maugham
Maugham (1934)
Tavalludi	William Somerset Maugham 25-yanvar 1874-yil Parij, Fransiya
Vafoti	16-dekabr 1965-yil(1965-12-16) (91 yoshda) Nice, Fransiya
Fuqaroligi	Birlashgan Qirollik
Taʼlimi	Heidelberg universiteti
Kasbi	Yozuvchi
Faoliyat yillari	1897–1964
Turmush oʻrtogʻi	Syrie Wellcome (turm. 1917; ajr. 1929)
Bolalari	Mary Elizabeth (Liza) Wellcome
Otasi	Robert Ormond Maugham
Onasi	Edith Mary Snell

William Somerset Maugham (talaffuzi: Uilyam Somerset Moem; 1874-yil 25-yanvar, Parij – 1965-yil 16-dekabr, Nice) – ingliz yozuvchisi. Fransiyadagi Britaniya elchixonasida xizmat qilgan. Heidelberg universitetida, keyin Londondagi tibbiyot institutida tahsil koʻrgan. Maughamning shu yillarda kechirgan hayoti materiallari asosida yozilgan „Liza of Lambeth“ („Lambetlik Liza“) (1897) romani mashhur. Shundan keyin Maugham vrachlik ixtisosidan voz kechib, yozuvchilik bilan shugʻullangan. U asosan Fransiyaning janubiy tomonlarida yashab, 60 yillik adabiy faoliyati davomida koʻplab roman, hikoya, pyesa, adabiy-tanqidiy etyud va memuar asarlar yozgan.

Maugham Birinchi jahon urushi yillarida Britaniya razvedkasining xodimi sifatida bir qancha mamlakatlar, shu jumladan, Rossiyada ham boʻlgan va „Ashenden: Or the British Agent“ („Ashenden yoki Britaniya agenti“) (1928) hikoyalar toʻplamida shu haqda naql qiladi. Maugham birinchi pyesasi – „Lady Frederick“ („Ledi Frederick“) (1907) ning katta muvaffaqiyat qozonganidan ragʻbatlanib, „The Unknown“ („Nomaʼlumlik“) (1920), „For Services Rendered“ („Sadoqatli xizmati uchun“) (1932) va „Sheppey“ (1933) pyesalarini yozgan. Maugham pyesalarida XX asrning 1-yarmidagi ingliz jamiyati hayoti manzaralari aks etgan. Adibning Yomgʻir nomi ostida hikoyalar toplami Akademnashr nashryotida oʻzbekchaga oʻgirilib chop etildi. „The Moon and Sixpence“ („Oy va choychaqa“) (1919), „Cakes and Ale“ („Shirin kulcha va pivo“) (1930), „Theatre“ („Teatr“) (1937) va boshqa asarlar muallifi. Maughamning „Of Human Bondage“ („Insoniy ehtiroslar zalvori“) (1915) avtobiografiy romani, ayniqsa, mashhur boʻlib, unda roman qahramoni – yosh yigit va u bilan toʻqnashgan kishilar talqinidagi nozik psixologizm hayot manzaralarining keng tasviri bilan tutashgan holda asarga oʻzgacha badiiy latofat bagʻishlagan. „Notanish odam Parijda“ romani oʻzbek tiliga tarjima qilingan (2002).

Adabiyotlar

• Oʻzbekiston milliy ensiklopediyasi. Birinchi jild. Toshkent, 2000-yil.