Ishoq qori Karimov

Ishoq qori Karimov
Shaxsiy maʼlumotlari
Tavalludi	1897-yil
Vafoti	1941-yil
Fuqaroligi	SSSR
Millati	oʻzbek
Kasbi	rejissyor aktyor

Ishoq qori Karimov (1897—1941-yil) — sovet va oʻzbek teatr rejissyori va aktyori. Andijon teatri bosh rejissyori. Aktyorlik sohasida ekstsentrik rollar ustasi.

Hayoti va mehnat faoliyati

Ishoq qori Karimov Andijon shahrining Yulduz mahallasida oddiy dehqon oilasida tavallud topgan. Dastlab, u eski usuldagi maktabda tahsil oladi va keyin qorixonada oʻqib Qur’onni xatm qilgan. 1918—1919-yil yanvar oyigacha Andijonda „Dorulmuallim“da va 1919-yilda qisqa vaqt mobaynida „Dorul harb“ — harbiy kadrlar tayyorlash kursida oʻqigan. U oʻsha yili Mahkam qoʻrboshi toʻdasi tarkibida boʻlgan.

1919—1921-yillarda komsomol va firqa aʼzosi hisoblangan. 1920-yilda oʻqituvchilar tayyorlash kursini tamomlagan. 1922-yildan Andijon teatrida aktyor boʻlib ishlagan. 1924—1927-yillarda Moskvadagi „Oʻzbek davlat drama studiyasi“da tahsil olgan. 1927—1928-yillar oraligʻida Oʻzbek davlat Namuna drama teatrida aktyor sifatida faoliyat olib boradi. 1929—1937-yillar mobaynida esa Andijon musiqali drama teatrida aktyor va rejissyor boʻlib faoliyat yuritadi.

1930-yilda „Saʼdulla Qosimov sudi“ boʻyicha bir yil qamoqda oʻtirgan va „Milliy ittihod“ tashkiloti aʼzolarini ishini fosh qilgan.

Qamoqdan chiqqach, yana Andijon teatriga qaytib, bosh rejissyor lavozimida ish boshlaydi. Ishoq qori Karimov aktyor oʻlaroq ekstsentrik rollar ustasi hisoblangan. Ijodiy faoliyati davomida aktyor „Ikki kommunist“da Ahmad ponsod, „Hujum“da Murid, „Shtorm“da Vaska, „Yondiramiz“da Samsoq, „Oʻrtoqlar“da Oysara otin rollarini mahorat bilan ijro etgan. Rejissyorlik faoliyati davrida esa K.Yashishning „Gulsara“, Xurshidning „Farhod-Shirin“, N.Gogolning „Uylanish“ va „Revizyor“ asarlarini sahnalashtirgan. Ishoq qori Karimovning sahnalshtirgan asarlasrida mavjud siyosiy sharoitdan norozilik kayfiyati sezilib turardi.

1937-yili 21-iyulda qamoqqa olingan. 1938-yilda aksil inqilobiy tashkilot aʼzosi sifatida 10 yilga kesilgan. 1941-yil 28-yanvarda Kolimada halok boʻlgan.