Natalya Kornelyevna

Natalya Kornelyevna
Tavalludi	1954-yil 17-avgust Moskva
Vafoti	1995-yil 6-fevral Moskva
Ijod qilgan tillari	Rus tili
Fuqaroligi	SSSR → Rossiya
Yoʻnalish	Bolalar uchun ertaklar

Natalya Kornelyevna Abramseva (1954-yil 17-avgust, Moskva – 1995-yil 6-fevral, Moskva) – rus bolalar yozuvchisi.

Biografiyasi

Natalya Abramseva harbiy xizmatchi Korneliy Kornelyevich Abramsev (keyinchalik taniqli yozuvchi-dramaturg) va rus tili hamda adabiyoti oʻqituvchisi Lyudmila Nikolayevna oilasida dunyoga kelgan. Koʻp oʻtmay, otasi Ukrainaning kichik Belokorovich shaharchasiga xizmat safariga yuborilgan, boʻlajak yozuvchi ota-onasi bilan u yerda ikki yil yashagan. Bolalik paytida orqa miya kasalligiga chalingani tufayli, Natalya toʻshakka mixlanib qolgan. Jismoniy xastaligiga qaramay, Natalya toʻlaqonli hayot kechirishga harakat qilgan: koʻp kitob oʻqigan, nafaqat rus tilida, balki ingliz va ispan tillarida ham kitoblar oʻqir, hikoyalar va ocherklar yozardi. Biroq yozuvchining asosiy mashgʻuloti ertaklar yozish boʻlib qolgan. Adibaning 40 yil umr koʻrgani tibbiyotda noyob va tushuntirib boʻlmas holat hisoblanadi. Natalya Abramseva bolalar va kattalar uchun jami 120 ga yaqin ertak va hikoya, 12 ta teatr pyesasi yozgan. Uning asarlari koʻplab xorijiy tillarga tarjima qilingan; Rossiya, yaqin va uzoq xorij mamlakatlar teatrlarida pyesa sifatida sahnalashtirilgan; asarlari multfilmlar ssenariylariga asos boʻlgan. „Skazki dlya dobrix serdes“, „Raduga v sochelnik“, „Rojdestvenskiye gryozi“, „Chudesa da i tolko“, „Chto takoye zima“, „S kem razgovarivayut sobaki“ toʻplamlari alohida kitob boʻlib nashr etilgan. Natalya Abramsevaga „Spokoynoy nochi, malishi!“ telekoʻrsatuvining bir nechta ssenariylari tegishli. 1978-yilda „Lastochka“ ertagi eʼlon qilingan va shu bilan uning ertaklarining zafarli yurishi boshlangan. 1984-yilda u bir vaqtning oʻzida „Ogonyok“ va „Sovetskaya jenshina“ jurnallarining yillik mukofoti sovrindori boʻlgan. 90-yillarda adibaning asarlari xalqaro miqyosda keng shuhrat qozongan. 1985-yilda uning „Skazka o vesyoloy pchele“ nomli birinchi kitobi, 1988-yilda „Chto takoye zima“ toʻplami, 1990-yilda „Den rojdeniya“ toʻplami chop etilgan, 1992-yilda esa yozuvchi ertaklari bilan bezatilgan taqvim nashrdan chiqqan. 1978-yildan boshlab uning asarlari „Vechernyaya Moskva“, „Sudarushka“ gazetalarida, „Rabotnitsa“, „Poznayka“, „Liza“, „Foma“ va boshqa koʻplab jurnallarda muntazam ravishda nashr etib borilgan. 1990-yilda u SSSR Yozuvchilar uyushmasiga aʼzo boʻlgan. 1995-yil 6-fevralda vafot etgan va Vagankovskiy qabristoniga dafn etilgan.