Neʼmat Arslon

Neʼmat Arslon
Tavalludi	7-iyun 1941-yil (1941-06-07) Qashqadaryo viloyati, Shahrisabz tumani, Takiya qishlogʻi
Kasbi	yozuvchi
Ijod qilgan tillari	oʻzbek tili
Fuqaroligi	Oʻzbekiston
Janr	nasr

Neʼmat Arslon (1941-yil 7-iyun Qashqadaryo viloyati, Shahrisabz tumani, Takiya qishlogʻi) — oʻzbek adibi. Oʻzbekiston Yozuvchilar uyushmasi aʼzosi.

Tarjimai holi

Neʼmat Arslon 1941-yil 7-iyun kuni Qashqadaryo viloyati Shahrisabz tumani Miraki qoʻrgʻonchasi yaqinidagi Takiya qishlogʻida dunyoga keldi. U 1965-yilda Samarqand davlat universitetini tamomlagan. 1971—1980-yillardan boshlab „Oʻzbekiston adabiyoti va sanʼati“ gazetasi, „Yoshlik“, „Sharq yulduzi“ jurnallarida hikoya, qissa, romanlari nashr etila boshladi.

Ijodi

Neʼmat Arslonning dastlabki „Osmonni kim koʻtarib turadi?“ nomli hikoyasi „Oʻzbekiston adabiyoti va sanʼati“ gazetasida nashr etildi. Shundan soʻng „Mahmasharif xabardor“, „Ayol suvratiga chizgilar“, „Bir yigitning xayoli“, „Quyoshning koʻz yoshlari“, „Dengizda suzardi bir kema“, „Kafolat“, „Qoʻmondon“ nomli asarlari birin-ketin chop etildi. Adibning ikkinchi kitobi „Ayol suvratiga chizgilar“ deb nomlandi. Bu kitobga „Muhabbat oʻyini“, „Osmonning boʻyogʻi“, „Aravakash“, „Oqqanotli kapalak“, „Enaga“, „Bugʻdoyzorda“, „Betakror hilqat“ kabi bir qator hikoyalar jamlangan. U oʻtgan asrning 90-yillarida modernizm yoʻnalishida „Adam vodiysi“, „Mavhumot“ nomli romanlarini yozdi. Neʼmat Arslon oʻz asarlari haqida shunday deydi: „Men har bir asarimni jahon adabiyoti asarlariga xos qilib yozishga harakat qilaman. Baʼzida hayot tashvishlaridan charchasam, asarlarimdagi oʻzim yaratgan Keshkash shahriga qochib ketaman. Uning koʻchalari, hiyobonlari, oʻzim yaratgan shu shahar kishilari davrasida yashayman“.

Oilasi

Adibning bobosi Mulla Toʻraboy — adabiyotni yaxshi biladigan arab, fors tillarida gaplasha oladigan kishi. Onasi Nusrat aya adabiyotga qiziquvchan ayol boʻlgan. Ishtiyoqi kelganda Muqimiydan, Furqatdan, Navoiy va Hofizdan sheʼrlar aytardi. Ikki togʻasi — Abdurashid va Xudoyberdi ham hayotini adabiyotsiz tasavvur eta olmaydigan kishilar.