Sergey Maksimov

Sergey Maksimov
Tavalludi	Сергей Сергеевич Пасхин 1916-yil 1(16)-iyun Rossiya imperiyasi
Vafoti	1967-yil 11-mart Los-Anjeles
Taxallusi	Sergey Shirokov
Ijod qilgan tillari	ruscha
Fuqaroligi	SSSR AQSh

Sergey Sergeyevich Maksimov (asl familiyasi: chet elda Pashin, SSSRda Pasxin; 1916-yil 1 (14)-iyun, Chernopen qishlogʻi, Kostroma guberniyasi – 1967-yil 12-mart, Los-Anjeles) – rus nasrnavisi, shoiri va dramaturgi. Maksimov rus muhojirligining ikkinchi toʻlqini vakili hisoblanadi.

Biografiyasi

Sergey Sergeyevich Volgadagi Chernopen qishlogʻida, eski eʼtiqodli oilada, qishloq oʻqituvchisining farzandi boʻlib dunyoga kelgan. 1918-yilda Maksimovning otasi Yaroslavlda soʻl eserlarning qoʻzgʻolonida qatnashgani sababli, taʼqiblardan choʻchib, dastlab Kostromaga koʻchib oʻtdi, 1923-yilda esa Moskvaga joylashdi.

Maksimov bolaligidan boshlab ijod qilishga qiziqib kelgan; uning birinchi eʼlon qilingan hikoyasi „Baken“ (1931-yilda „Murzilka“ jurnalida nashr etilgan) edi. Shoir shuningdek „Ogonyok“, „Yoj“, „Smena“ jurnallarida ham oʻz asarlarini chop ettirgan. Maksimov 1934-yilda Toʻqimachilik institutiga oʻqishga kirgan.

1936-yilda „sovetlarga qarshi tashviqot“ ayblovi bilan 5 yilga hukm qilinib, jazoni Sevjeldorlagʻda oʻtagan. Ozodlikka chiqqandan soʻng (1941-yil) unga Moskvada yashash taqiqlangan va Kalugaga koʻchib ketgan.

Maksimov ikkinchi emigratsiya davrining eng isteʼdodli yozuvchilaridan biridir. U oʻz hikoyalarida sovet konslagerlarida zulm qurboni boʻlgan alohida shaxslar taqdirini juda qiziqarli va taʼsirchan tarzda tasvirlaydi. Bu hikoyalar keyinroq yaratilgan V. Shalamovning lager hikoyalari kabi eʼtiborga sazovordir. „Denis Bushuyev“ Stalin davri voqealarini aks ettiruvchi oilaviy roman boʻlib, unda insonlarning ichki dunyosi va oʻzaro munosabatlari tasvirlanadi, shuningdek, davlat hokimiyati va uning lagerlari tomonidan bu hayotga boʻlgan tahdid ham koʻrsatiladi. Bu tahdid oxir-oqibat oilani parchalab yuboradi. Romanning ikkinchi kitobi birinchisiga nisbatan ancha zaif. Maksimov gʻayrioddiy taqdirlarni ham alohida epizodlarda, ham katta syujet qatlamlarida yorqin tasvirlashga muvaffaq boʻladi.