Bobo Piriy

Bobo Piriy – “Nasoyim ul-muhabbat”da tilga olingan majzub darvesh. Alisher Navoiy Bobo Piriy haqida oʻzi bilan bogʻliq quyidagi hikoyatni keltiradi: “Xalqni koʻp safohatomiz soʻkar edi. Bu haqir aning ilayidin oʻtmas erdim. Va hol ulki, maskani om yoʻli ustida edi. Bir kun bir hamroh soʻrdiki, bu yerga yetkanda, doyim yoʻlni evurub, Bobo ilayidin oʻtmassen, sabab nedur, ayt?! Dedimki, bu jihatdinki, fahsh soʻkar, manga xush kelmaski, aning fahshin eshitkaymen. Ul hamroh dediki, Boboni derlarki, karomati bor, kel, ilayidin oʻt. Agar karomati boʻlsa, seni soʻkmagay. Agarchi imtihon erdi, ammo ul degandek ilayidin oʻttum, soʻkmadi. Odatining xilofi – duo qildi”.