Radioteleoʻlchash

Radioteleoʻlchash, radiotelemetriya — turli fizik, texnik va boshqa kattaliklarni uzoqdan turib oʻlchash. Oʻlchanadigan kattalik elektr signallarga aylantirilib, nazorat punktiga radio orqali uzatiladi. R. tizimida oʻlchanadigan kattalik datchik yordamida radiouzatkichning yuqori chastotali tebranishlarini modulyasiyalovchi (qarang Modulyasiya) elektr signallariga aylanadi. Bir vaqtda bir nechta kattaliklarni oʻlchash uchun koʻp kanalli radioalokadan foydalaniladi. Qabul qilish st-yasida signallar fotoplyonka, magnit lenta va boshqalarga yozib olinishi mumkin (qarang Radiotelemexanika).