Shoazim Minovarov

Shoazim Minovarov
Oʻzbekiston Respublikasi Prezidentining jamoat va diniy tashkilotlar bilan aloqalar boʻyicha davlat maslahatchisi
Mansab davri 2021-yil 25-maydan – 2022-yil 2-fevralgacha
Prezident	Shavkat Mirziyoyev
Oʻtmishdoshi	Rustam Qosimov
Vorisi	Muzaffar Komilov
Oʻzbekiston Respublikasi Prezidenti davlat maslahatchisi
Mansab davri 2006-yil 1-avgustdan – 2006-yil 1-dekabrgacha
Prezident	Islom Karimov
Oʻtmishdoshi	Najmiddin Komilov
Vorisi	Bahrom Abduhalimov
Oʻzbekiston islom sivilizatsiyasi markazi direktori
Mansab davri 2017-yil 17-iyuldan – hozirgi vaqtgacha
Prezident	Shavkat Mirziyoyev
Oʻtmishdoshi	lavozim ta'sis etilgan
Shaxsiy maʼlumotlari
Tavalludi	1-avgust 1951-yil
Mukofotlari

Shoazim Shoislamovich Minovarov (1951-yil 1-avgust, Toshkent, Oʻzbekiston SSR) — Oʻzbekiston islom sivilizatsiyasi markazi direktori, Oʻzbekiston Prezidentining Jamoat va diniy tashkilotlar bilan aloqalar boʻyicha sobiq davlat maslahatchisi. Asl kasbi tarjimonlik.

Munavvarqori Abdurashidxon oʻgʻlining nabirasi.

Shaxsiy hayoti

Shoazim Minovarov 1951-yil 1-avgustda Toshkent shahrida tugʻilgan. Uning bobosi jadidchilik harakatining namoyandalaridan biri Munavvarqori Abdurashidxon oʻgʻlidir. Shoazim Minovarovning asl kasbi tarjimonlik boʻlidiy, Abdulla Avloniy va Munavvarqori Abdurashidxon oʻgʻli „Buyuk xizmatlari uchun“ ordeni bilan taqdirlanganida, bu mukofotlarni Shoazim Minovarov qabul qilib olgan.

Shoazim Minovarov 1973-yilda Oʻzbekiston Milliy universitetining fransuz tili va adabiyoti yoʻnalishini tamomlagan. SSSRning Gvineyadagi elchixonasida va Jazoirdagi bosh konsulligida ishlagan.

Tarjimonlik faoliyati

U tarjimon sifatida fransuz tilidan Charles Perronning „Ona gʻoz ertaklari“, „Qizil qalpoqcha“, „Kuloyim yoki billur boshmoqchalar“, „Ustasi farang yoki etik kiygan mushuk“, „Sehrgarlar“, „Kokildor Rike“ ertaklarini, Jean-Marie Gustave Le Clézioning „Odel. Mondo va boshqa hikoyatlar“ asarini, François Mauriacning „Ilonlar komida“ romanini, Montesquieuning „Fors nomalari“ asarini, Lucien Kerenning „Buyuk Temur“ pyesasini, Patrick Modianoning „Toʻy sayohati“ romani va Maupassantning hikoyalarini oʻzbek tiliga tarjima qilgan.

Faoliyati

• 1973-yilda Toshkent davlat universitetini fransuz tili va adabiyoti oʻqituvchisi mutaxassisligi boʻyicha tamomlagan.
• 1973-1994 — Toshkent davlat universitetida chet tili oʻqituvchisi.
• 1994-1997 — Oʻzbekiston Respublikasi Tashqi ishlar vazirligi Yevropa mamlakatlari departamentining birinchi kotibi;
• 1997-yil 27-iyundan — 2006-yil 1-avgustgacha — Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita raisi;
• 2006-yil 1-avgustdan — 1-dekabrgacha — Oʻzbekiston Respublikasi Prezidenti davlat maslahatchisi;
• 2006-yil 1-dekabrdan — 2008-yil 28-iyungacha — Oʻzbekiston Respublikasi Tashqi ishlar vaziri oʻrinbosari;
• 2008-yildan — 2012-yilgacha — Oʻzbekistonning Misrdagi Favqulodda va muxtor elchisi;
• 2013-yildan nafaqada;
• 2015-yil apreldan — 2017-yil iyulgacha — Toshkentdagi Fransuz alyansi (fransuzcha: Alliance Française Tachkent) raisi;
• 2017-yil 17-iyuldan hozirgacha — Oʻzbekiston islom sivilizatsiyasi markazi direktori;
• 2021-yil 25-maydan 2022-yil 2-fevralgacha — Oʻzbekiston Respublikasi Prezidentining jamoat va diniy tashkilotlar bilan aloqalar boʻyicha davlat maslahatchisi.