Buxoro davlat universiteti

Buxoro davlat universiteti
	Buxoro davlat universiteti
Xalqaro nomi	Bukhara State University (BukhSU)
Shiori	Yuksak taraqqiyot-kuchli bilim, ilm-fan va tafakkurda!
Turi	universitet
Asos solingan sanasi	1930-yil
Rektori	Obidjon Xamidov
Fakultetlar	10
Talabalari	21776 ta
Bakalavriat	21175
Magistratura	601
Joylashuvi	Buxoro, Oʻzbekiston
Veb-sayti	http://buxdu.uz

Buxoro universiteti (Fayzulla Xoʻjayev nomidagi Buxoro davlat pedagika instituti, BuxDU) – Oʻzbekistonning Buxoro viloyati, Buxoro shahrida joylashgan oliy taʼlim dargohi. Universitet dastlab 1930-yilda Buxoro Oliy pedagogika instituti sifatida tashkil qilingan. 1992-yil 15-martda Oʻzbekiston Respublikasi prezidenti farmoniga asosan Buxoro pedagogika institutiga universitet maqomi berilgan^[1]. Oliygoh oʻz ichiga 10 ta fakultetni qamrab oladi. Bular: Fizika-matematika, Iqtisodiyot va turizm, Axborot texnologiyalari, Tarix va yuridik, Filologiya, Xorijiy tillar, Tabiiy fanlar, Agranomiya va biotexnologiya, Sanʼatshunoslik hamda Sport faoliyati va pedagogika fakultetidir. Universitetga kirish uchun qabul jarayonlari Bilim va malakalarni baholash agentligi tomonidan tasdiqlangan kvotalar asosida tashkil etiladi.

Tarixi

1930-yil 14-aprelda Oʻzbekiston SSR Maorif XKS rejasi boʻyicha davlat byudjeti hisobidan Buxoroda oliy pedagogika institutini tashkil etish boʻyicha qaror qabul qilingan. 1930-yil 9-sentyabr kuni Oʻzbekiston SSR Maorif komissariati tomonidan Buxoro oliy pedagogika institutini (hozirgi Buxoro davlat universitetini) tashkil etish toʻgʻrisida 146-sonli buyruq chiqarilgan. Institut 1930-yilning oktyabr oyidan boshlab oʻz faoliyatini boshlagan. Oliygohda dastlab boʻlimlar tashkil etilgan. 1930-yildan boshlab ijtimoiy-adabiy, kimyo-biologiya boʻlimi, 1931-yil agrar-pedagogika, 1932-yilda fizika-texnika boʻlimi oʻz faoliyatini boshlagan. 1931-yil dargohda ijtimoiy-adabiy va kimyo-biologiya boʻlimlarida jami 53 nafar talaba tahsil olgan. 1931-yil agrar-pedagogika boʻlimida 40 nafar, 1932-yil fizika-texnika boʻlimida esa 16 nafar talaba oʻqigan. 1930-yil noyabr oyidan boshlab oliygoh talabalarni qabul qilgan. Dargohning birinchi direktori Karimjon Vahobov boʻlgan. Buxoro viloyati davlat arxivi maʼlumotlariga koʻra, oliygohda 1930-yil 56 ta, 1931-yil 180 ta 1932-yil 246 ta, 1933-yil 211 ta talabalar tahsil olgan. Oliy oʻquv yurti 1930-yil Buxoro oliy pedagogika instituti, 1931-yildan Fayzulla Xoʻjayev nomidagi Buxoro oliy pedagogika instituti, 1933-yildan Fayzulla Xoʻjayev nomidagi Buxoro davlat pedagogika instituti, 1937-yildan S.Ordjonikidze nomidagi Buxoro davlat pedagogika instituti, 1981-yildan S. Ordjonikidze nomidagi „Hurmat belgisi“ ordenli Buxoro davlat pedagogika instituti, 1990-yildan Fayzulla Xoʻjaev nomidagi Buxoro oliy pedagogika instituti, 1992-yil 15-martdan boshlab esa Buxoro davlat universiteti deb nomlangan^[1].

Faoliyati

Buxoro davlat universitetida bir ijtimoiy oʻquv markazi, 50 ta ixtisoslashtirilgan kafedra, mintaqaviy til markazi, ixtisoslashtirilgan akademik litsey, gimnaziya, tayyorlov kurslari, kutubxona (nodir qoʻlyozmalar va toshbosma asarlar boʻlimi bilan), botanika bogʻi, planetariy, hisoblash markazi, test markazi, universitet tarixi, oʻlka zoologiyasi, arxeologiya muzeylari, oʻquv-sport, sport harbiy tayyorlov, sport sogʻlomlashtirish majmualari, maʼrifiy-madaniy ishlar klubi bor (2001). Unda 23 ixtisoslik boʻyicha mutaxassislar tayyorlaniladi. Unda aspirantura, magistratura, doktorantura mavjud. 2000/2001-oʻquv yili unda 5 mingdan ortiq talaba taʼlim oldi, 341 oʻqituvchi, jumladan 1 nafar Oʻzbekiston Fanlar akademiyasining akademigi, 28 ta fan doktori va professor, 272 ta fan nomzodi va dotsent ishladi. Unda turli yoʻnalishlarda ilmiy tadqiqotlar ishlari olib boriladi. Rossiya Federatsiyasi, Italiya, Irlandiya, Fransiya, MAP, Polsha, Germaniya, AQSH ilmiy muassasalari bilan ilmiy hamkorlik qiladi. Tashkil topganidan buyon universitet 25 mingdan ortiq mutaxassis tayyorlab chiqargan (2001).

Buxoro davlat universiteti rektorlari

Rektor	Davri
Vahabov Karimjon	1930-1931
Usmonov Gʻanijon	1931-1934
Valiyev X. X	1934-1935
Rajabov D	1935-1936
Tereshxanov G.X	1937-1938
Rustamov Aʼzam	1938-1940
Sbizova Anna Ivanovna	1940
Davlat-Yusupov Mustafo Xasanovich	1940-1943
Hamidov (Homidiy) Sharif Xamidovich	1944-1948
Joʻrayev Turob Joʻrayevich	1948-1950
Maqsudov Sh. T	1951-1955
Yakubov R	1955-1957
Raxmatov Muxtor Neʼmatovich	1957-1960
Namozov Juma Namozovich	1960-1977
Jabborov Narimon Ibragimovich	1977-1979
Moʻminov Vafo Arabovich	1979-1986
Qosimov Farhod Xabibovich	1986-1992
Muqimov Komil Muqimovich	1992-2005
Yoriyev Oltin Muzaffarovich	2005-2009
Tadjixodjayev Zokirxoʻja	2010-2014
Tulaganov Abdukabil Abdunabievich	2014-2019
Xamidov Obidjon Xafizovich	2019-yildan