Grigoriy Margulis

Grigoriy Margulis
Tavalludi	24-fevral 1946-yil (1946-02-24) Moskva, Sovet Ittifoqi
Fuqaroligi	Rossiya AQSh
Sohasi	Matematika
Institutlar	Yale Universiteti
Taʼlimi	Moskva davlat universiteti
Akademik rahbarlari	Yakov Sinay
Mashhur shogirdlari	Emmanuel Breuillard Hee Oh
Mashhur ishlari	Diophantus yaqinlashishi Lie guruhi Superqattiqlik teoremasi Ekspander grafigi Oppenheim gipotezasi
Mukofotlari	Fields medali (1978) Lobachevskiy mukofoti (1996) Wolf mukofoti (2005) Abel mukofoti (2020)

Grigoriy Aleksandrovich Margulis (ruscha: Григорий Александрович Маргулис) (1946-yil 24-fevralda tugʻilgan) — rossiyalik-amerikalik matematik. Margulis fizika-matematika fanlari doktori, Rossiya fanlar akademiyasining axborot uzatish muammolari instituti tadqiqotchisi va Amerikadagi Yale Universiteti professori.

Margulis 1962-yilgi Xalqaro matematika olimpiadasining kumush medal sovrindoridir. U 1967-yilda Moskva davlat universitetining mexanika va matematika fakultetini tamomlagan. Yakov Sinay rahbarligi ostida ergodik nazariya boʻyicha nomzodlik dissertatsiyasini himoya qilgan. Keyinchialik Lie guruhi teoriyalarini oʻrgana boshlagan, ularni matematikaning turli sohalari tatbiq qilgan. Margulis 1978-yilda Fields medaliga sazovor boʻlgan, ammo u chiqish vizasi berilmaganligi sababli taqdimot marosimida qatnashmagan.

Margulis 1979-yilda Bonnga borgan va shu vaqtdan boshlab chet elga bemalol sayohat qilish imkoniyatiga ega boʻlgan, ammo Rossiya Fanlar akademiyasining axborot uzatish muammolari institutida tadqiqotchi boʻlib ishlashda davom ettirgan. 1991-yilda esa AQShdagi Yale Universitetiga ishlashga taklif qilingan.

Margulis 2001-yilda AQSh Milliy fanlar akademiyasining aʼzosi etib saylangan, 2012-yildan beri Amerika matematik jamiyatining toʻla aʼzosidir. Margulis Fields medali, Wolf mukofoti (2005) hamda Abel mukofoti (2020) bilan taqdirlangan besh matematikning biridir (Pierre Deligne, John Milnor, Jean-Pierre Serre hamda John Thompson bilan bir qatorda). U, shuningdek, 1996-yil Lobachevskiy mukofoti bilan taqdirlangan.